Related Posts Plugin for WordPress, Blogger...

Tuesday, 16 January 2018

CARS : එදා මෝටර් රථ ලොවේ අන්තිමයා වූ KIA අද ඉන්න තැන


දකුණු කොරියාවේ දෙවන විශාලතම රථවාහන නිෂ්පාදකයා වන්නේ කියා සමාගමයි. අදවන විට වසරකට විවිධ වර්ගයේ වාහන මිලියන 3.5ක් පමණ අලෙවි කරන කියා සමාගමේ අයිතියෙන් 33%ක් හුන්ඩායි සමාගම සතුවෙනවා. 1944දී බයිසිකල් නිෂ්පාදනය සඳහා ඇරඹූ කියා සමාගම රථවාහන නිෂපාදනයට පිවිසුනේ 1957දී හොන්ඩා සමාගමේ කුඩා මෝටර් සයිකල් මාදිලියක් කොරියාවේ සෑදීම සඳහා අවසර ලබාගැනීමෙන් පසුවයි. 1962දී මැස්ඩා සමාගමේ අවසරයෙන් ට්‍රක් රථමාදිලියක් හා 1974දී මැස්ඩා කාර් රථයක්ද නිෂ්පාදනය කරන්නට පටන්ගත්තා.


මුලින් කොරියානු වාහන වෙළඳපොලට පමණක් සීමාවී තිබූ කියා වාහන අලෙවිය 90 දශකයේ වෙනත් රටවලටද ව්‍යාප්තවූ අතර අනූව දශකය අවසාන වනවිට ඇමරිකා එක්සත් ජනපදය කරාද ව්‍යාප්ත කලා. කෙසේ වෙතත් කියා සන්නාමය ඇමරිකාවේදී දැඩි පසුබෑමකට පත්වූයේ එය ලෝකයේ ඉතාමත් තරඟකාරීම වෙළඳපොල වූ නිසා. 

ඒ වනවිට ජෙනරල් මෝටර්ස්, ෆෝඩ් හා ක්‍රයිස්ලර් වැනි ජනප්‍රිය ඇමරිකානු සන්නාම අභිබවා ඉහලම තත්වයේ කාර් නිෂ්පාදකයින් බවට ජපානයේ ටොයෝටා, නිසාන් හා හොන්ඩා සමාගම් පත්වී තිබූ අතර ටොයෝටා කැම්රි, හොන්ඩා සිවික් වැනි ජපන් මාදිලි ඇමරිකාවේ ජනප්‍රියම කාර් රථ බවට පත්වී තිබුන අතර ඒවා මිලියන ගණනින් අලෙවි වුනා.

1998 වනවිට කියා සමාගම බංකොලොත්වූ අතර හුන්ඩායි සමාගමේ ආයෝජන මත එය නැවතත් සක්‍රිය වුනා.




නවීන උපාංග, සුවපහසුව හා ඉහලම විශ්වාසදායි ක්‍රියාකාරිත්වය යන මාන සියල්ලෙන්ම ජපන් කාර් ඇමරිකාවේ අංක එක  බවට පත්වෙද්දී කොරියානු කියා වාහන,  තත්වය (quality) හා විශ්වාසදායිතාවය (reliability) අතින් පහතම අඩියට වැටී තිබුණා. අලුත් වාහන වල තත්වය හා විශ්වාසදායිතාවය පිලිබඳ සමීක්ෂණය කරන සුප්‍රකට J.D. Power Initial Quality Study (IQS) සමීක්ෂණයේදී කියා සමාගමේ වාහන මාදිලි බොහොමයක් අංක 35ටත් පහලින් රැඳී සිටි අතර 2005 වනතෙක්ම 30වන ස්ථානයෙන් ඉහලට එන්නට කියා වාහනවලට නොහැකිවී තිබුණා. අලුත් වාහනයක් මිළදීගෙන තෙමසක් ඇතුලත පාරිභෝගිකයා විසින් තමන් මිලදීගත් වාහනයේ තත්වය හා විශ්වාසදායිතාවය පිලිබඳව හා කොපමණ යාන්ත්‍රික හා වෙනත් දෝශ හා ගැටලුවලට මුහුණ දුන්නාද යන මාන ඇසුරින් සැකසෙන ජේ.ඩී පවර් කොලිට් ස්ටඩී වාර්තාව ඇමරිකාවේ මෙන්ම ලෝකයේ වෙනත් රටවලද වාහන නිෂ්පාදකයින්ගේ සාර්ථකත්වය මැන බැලීම සඳහා යොදාගන්නවා.


කෙසේ වෙතත් 2006 වසර වන විට මේ කණගාටුදායක තත්වයේ දැවැන්ත වෙනසක් සිදුකිරීමට කියා කළමණාකාරිත්වය  කටයුතු කලා. ඉතාමත් ආකර්ෂණීය මෝටර් රථ නිර්මාණය කරගැනීම සඳහා ජර්මනියේ අව්ඩි සමාගමේ ප්‍රධාන නිර්මාණශිල්පී පීටර් ෂ්‍රෙයර් අධික වේතනයක් ගෙවමින් කියා සමාගමට බඳවාගත් අතර නවමු ආකාරයේ වාහන හැඩගැන්වීම් සඳහා ඔහුට නිදහස ලබාදුන්නා. 

අව්ඩි සමාගම වෙනුවෙන් Audi TT Coupé වැනි අති සාර්ථක මාදිලි නිර්මාණය කල පීටර් ෂ්‍රෙයර් ආකර්ෂණීය නිර්මාණ බිහිකරද්දී තත්වය හා විශ්වාසනීයත්වය ඉහල දමාගැනීම සඳහා කියා සමාගම ඩොලර් බිලියනයක් පමණ ආයෝජනය කලා. කොරියාවේ, ඇමරිකාවේ හා වෙනත් රවල ඉතාමත් නවීන තාක්ෂණයෙන් යුතු කර්මාණ්තශාලා ඇතිකල කියා සමාගම තත්ව පාලනයේ හිනිපෙත්තේ සිටි ටොයෝටා සමාගම පවා අභිබවා යා හැකි තත්වපාලන රාමුවක් නිර්මාණයකර ගත්තා.

මේ වෑයමේ ප්‍රතිපල ඉතා ඉක්මණින් නෙලාගන්නට කියා සමාගමට හැකිවූ අතර 2016 හා 2017 යන වර්ෂ දෙකෙදීම J.D. Power Initial Quality Study (IQS) සමීක්ෂණයේ ඉහලම තත්වයේ වාහන සන්නාමය බවට කියා පත්වී තිබෙනවා.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 14 January 2018

INNOVATION : 2017 වැඩිම පේටන්ට් IBM සමාගමට. දෙවෙනි තැන Samsung


සමාගමක් සතු පේටන්ට් බලපත්‍ර, එම සමාගමේ නවෝත්පාදන හැකියාව හා නව නිර්මාණ හැකියාව පෙන්වන ප්‍රධාන මිනුම් දණ්ඩක්. පසුගිය වසරේ වැඩිම පේටන්ට් බළපත්‍ර ප්‍රමාණයක් දිනාගැනීමට අයි.බී.එම් සමාගම සමත්වුනා. දෙවැනි තැන කොරියාවේ සැම්සුන්ග් ඉලෙක්ට්‍රොණික් සමාගමටද, තුන්වැනි තැන ජපානයේ කැනන් සමාගමටද හිමිවුනා.

පේටන්ට් බලපත්‍ර දිනාගැනීම අතින් ඉඅලින්ම ඉන්න සමාගම විස්ස පහතින් තියෙනවා.










__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Saturday, 13 January 2018

SPACE FLIGHT : කක්ෂයට ඇතුලුවූ සැනින් අතුරුදහන්වූ Zuma චන්ද්‍රිකාව


පසුගිය සතියේ ජනවාරි 7වැනිදා ඊලෝන් මස්ක් මහතාට  (TESLA, SpaceX, The Boring Company) අයත්  ස්පේස් X සමාගමේ ෆැල්කන් 9 රොකට්ටුවකින් ගුවන්ගත කල සූමා (Zuma) නම් චන්ද්‍රිකාව කක්ෂයට ඇතුලුවූ සැනින් අභිරහස් ලෙස අතුරුදහන් වී තිබෙනවා.

ෆ්ලොරිඩවේ කැනවරල් තුඩුවේ ගුවන්හමුදා රොකට් පර්යන්තයකින් අහසට නැගුනු ස්පේස් X ෆැල්කන් 9 රොකට්ටුව සූමා චන්ද්‍රිකාව කක්ෂය වෙත නිදහස් කොට නැවත කැනවරල් තුඩුවට ගොඩබැස්සා.  සිදුවිය යුතුව තිබුණේ සූමා චන්ද්‍රිකාව රැගත්  කොටසේ වැසුම් ඉවත්වී රොකට්ටු දල්වාගෙන චන්ද්‍රිකාව නිවැරදි කක්ෂය වෙත ඇතුලුවීමයි. කෙසේ වෙතත් ස්පෙස් X රොකට්ටුව නිරුපද්‍රිතව ආපසු පැමිණ පැය ගණනාවක් ගතවුනත් සූමා චන්ද්‍රිකාව කක්ෂගතවූ බවට තහවුරු කරමින් සිදුකල යුතු ජාත්‍යන්තර චන්ද්‍රිකා ලේඛණයේ (Space-Track.org) යාවත්කාලීන කිරීමක් සිදුවුනේ නෑ.


සූමා චන්ද්‍රිකාව නොර්ත්‍රොප් ගෘම්මාන් සමාගම මගින් නිෂ්පාදනය කරන ලද වාර්තාවන ආකාරයට ඩොලර් බිලියනයක් වටිනා අධිතාක්ෂණික චන්ද්‍රිකාවකි. ඉතාමත් රහසිගත ලෙස නිෂ්පාදනය කොට කක්ෂගත කරන ලද මේ චන්ද්‍රිකාව ඇමරිකානු රජයේ කුමන ආයතනයක් වෙනුවෙන් නිෂපාදනය කරන ලද්දේද?, කුමක් සඳහා එය කක්ෂගත කලේද යනාදී කිසිදු තොරතුරක් වාර්තාවන්නේ නෑ.

මේ අනුව මුලින් චන්ද්‍රිකාව කක්ෂගත කිරීමේදී යම් දෝශයක් වී එය කඩාවැටී ඇති බවට සැකයක් ඇතිවූයේ ඇමරිකන් ආරක්ෂක දෙපාර්තමේන්තු මාධ්‍ය ඒකකය චන්ද්‍රිකාව පිලිබඳව ස්පේස් X ආයතනයෙන් විමසන ලෙස මාධ්‍යවේදීන්ට දැනුම් දුන් පසුවයි. වහාම ප්‍රතිචාර දැක්වූ ස්පේස් X සමාගම, තමන්ගේ රොකට්ටුව ඉතාමත් හොඳින් ක්‍රියාත්මකවූ බවත් චන්ද්‍රිකාව රැගත් කොටස නියමිත කක්ෂය වෙත ගෙන ගිය තම රොකට්ටුව නැවත නිරුපද්‍රිතව ආපසු ගෙන්වාගත් බවත් පවසා සිටියා. තමන් අතින් කිසිදු වැරද්දක් නොවූ බව පවසන ස්පේස් X සමාගම සුපුරුදු ආකාරයෙන් ඊලඟ රොකට් ගුවන්ගත කිරීමට සූදානම් වන බව පැවසූවා.


පසුව රොකට්ටුව කක්ෂයේ නිවැරදි ස්ථානය වෙත යොමුකරන payload fairing කොටසේ දෝෂයක් ඇතිවී එමගින් චන්ද්‍රිකාව විනාෂවී යන්නට ඇතැයිද සැකයක් මතුවී තිබුණා. චන්ද්‍රිකාව කක්ෂයට ඇතුලුකරන (orbit injection) පේලෝඩ් ෆෙයාරින් කොටසද නෝත්‍රොප් සමාගම මගින් නිෂ්පාදනය කර ඇති අතර එහි දෝෂයක් ඇතිවුනානම් එහි වගකීම ස්පේස් X සමාගම මත පැවරිය නොහැකි බව විචාරකයින් පවසනවා.

ඩොලර් බිලියනයක් වටිනා චන්ද්‍රිකාවට කුමක් සිදුවුනේදැයි නිශ්චිත යමක් ප්‍රකාශකරන ලෙස දිගින් දිගටම මාධ්‍යවේදීන් ඉල්ලීම් කරද්දී ආරක්ෂක දෙපාර්තමේතු මාධ්‍ය ප්‍රකාශිකා ඩේනා වයිට් "සෙපේස් එක්ස්" සමාගමෙන් අසන ලෙස  නැවතත් පැවසීමේදී පෙන්ටගනයේ මාධ්‍ය සාකච්ඡා කාමරය තුල උණුසුම් තත්වයක් උද්ගතවූ බව එහි සිටි වාර්තාකරුවන් පැවසූවා.

කෙසේ වෙතත් සමහර ආරක්ෂක වාර්තාකරුවන් පවසන්නේ සූමා චන්ද්‍රිකාවේ ගැටලුවක් ඇති බව සාවද්‍ය බවත් එය නිරුපද්‍රිතව කක්ෂයට ඇතුලුවී ඉතා රහසින් ක්‍රියාත්මක වෙමින් ඇති බවයි.













__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Thursday, 11 January 2018

MILITARY AIRCRAFT : MQ-1 Predator Drone, ඔබට සුබ විශ්‍රාමයක්


ලොව පලමු ප්‍රහාරක ඩ්‍රෝන යානය වන ජෙනර්ල් ඇටොමික්ස් සමාගම නිර්මාණය කල MQ 1 Predator ඩ්‍රෝන යානය වසර විස්සක සේවාකාළයකින් පසු විශ්‍රාම යැවීමට ඇමරිකාව කටයුතු කරමින් සිටී. හඳුන්වාදුන් කාළයේ මිසයිල ගෙනයාමට නොව, ඔත්තු බැලීමට හා හමුදා මෙහෙයුම් වලදී ගොඩබිම් සේනාවලට මග පෙන්වීමට නිර්මාණය කල ප්‍රිඩේටර් ඩ්‍රෝනය පසුව හෙල්ෆයර් මිසයිල ගෙනයාමට අනුවර්තනය කරන ලදී.

නියමු රහිත යානා ලොව සියලුම රටවල නූතන යුධ සැළසුම් වලට අනුයුක්ත කරගැනීමට මගපෑදූ ප්‍රිඩේටර් ඩ්‍රෝනය ඉතා සරලව නිමැවූ යානයක් වුවද ප්‍රහාරක සාර්ථකත්වය අනුව බලන කල ඉතා විශිෂ්ඨ වාර්තා තබා ඇති යානයකි. 1994දී සිදුකල ප්‍රථම පියාසැරියෙන් පසු මේ වනවිට ප්‍රිඩේටර් යානා බළකාය ඒකාබද්ධ පියාසැරි පැය මිලියනයක් ඉක්මවා ඇත.

මේ වනවිට ප්‍රිඩේටර් යානා 360ක් නිපදවා ඇති අතර ඉන් වැඩි ගණනක් ඇමරිකානු ගුවන් හමුදාව මගින් මෙහෙයවයි.ප්‍රිඩේටර් යානය පලමුවරට යුධ මෙහෙයුම සඳහා යොදාගත්තේ මධ්‍යම යුරෝපයේ බොස්නියාවේදීය. ඒ 1995දීය.1999දී මධ්‍යම යුරෝපයේ යුගෝස්ලාවියාවේ සිදුවූ සටන් වලදීද ප්‍රිඩේටර් ඩ්‍රෝනය සාර්ථකව යොදාගෙන ඇත.

වසර 2000න් පසු ඇෆ්ඝනිස්ථානයේ හා පාකිස්ථානයේ රජයේ පාලනයෙන් වියුක්ත පෙදෙස්වල ත්‍රස්ත ඉලක්කවලට ප්‍රහාර එල්ල කිරීම ඇරඹූ ප්‍රිඩේටර් ඩ්‍රෝනය අල්ඛයිඩාවට විරුද්ධව සුප්‍රකට ඩ්‍රෝන යුද්ධයට බෙහෙවින් දායක වුනා.

පාකිස්ථානය ඉහල සිදුකල රහසිගත සී.අයි.ඒ ප්‍රිඩේටර් ඩ්‍රෝන මගින් ඔසාමා බින් ලාඩන් සැඟවී සිටින තැන සොයා ගත් අතර ඒ ඔස්සේ තවත් තවත් තොරතුරු හඹාගිය සී.අයි.ඒ ඒජන්සිය බින් ලාඩන් මරා දැම්මා.ප්‍රිඩේටර් ඩ්‍රෝනය හෙල්ෆයර් මිසයිලවලින් සන්නද්ධ කරනු ලැබුවේ 2001 සිටයි.











__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Wednesday, 10 January 2018

POLITICS : "Trump : FIRE & FURY" පොතට තොරතුරු දුන් ස්ටීවන් බැනන්ට ආයෙත් රස්සාව නැතිවෙයි!



ස්ටීවන් බැනන් කියන්නේ කාලයක් ඩොනල්ඩ් ට්‍රම්ප්ගේ ලඟම හිතවතෙක්. ඩොනල්ඩ් ට්‍රම්ප්ගේ මැතිවරණ ව්‍යාපාරයේ ප්‍රධාන විධායකයා විධියට ඔහුගේ ජයග්‍රහණයට කටයුතුකරපු බැනන්, ට්‍රම්ප් ජනාධිපතිගේ ප්‍රධාන උපායමාර්ගික නිළධාරියා විධියට පත්වීම් ලැබී කාලයක් ජනාධිපති ට්‍රම්ගේ විශ්වාසදායකම ඇතුලු කවයේ සාමාජිකයෙක්ව සිටියා. 

කෙසේ වෙතත් උග්‍ර දක්ෂිණාංශික මෙන්ම සුදු ජාතිකයින් වඩාත් උසස් යයි විශ්වාස කරන White Supremacist අදහස්  ඇති ස්ටීවන් බැනන් හා ට්‍රම්ප් අතර මත ගැටුම් ඇතිවන්න වැඩිකල ගතවුනේ නෑ. විශේෂයෙන්ම ට්‍රම්ප්ගේ ඇතුලු කවයේ සිටින ඔහුගේ දියණිය ඉවන්කා ට්‍රම්ප් හා ඇයගේ සැමියා වන ජෙරාඩ් කුෂ්නර් සමග දැඩි ලෙස මත ගැටුම් ඇතිකරගත් බැනන්, ඉවන්කා පට්ට පල් මෝඩියක් බව හිතවතුන්ට කියා තිබුණා.






බැනන් හා ට්‍රම්ප් අතර විරසකය උග්‍රවුනේ ට්‍රම්ප් එෆ්.බී.අයි ප්‍රධානී ජේම්ස් කොමේ ඉවත් කිරීමේ තීරණයට බැනන් විරුද්ධවීමත් සමගයි. එය ඇමරිකන් දේශපාලන ඉතිහාසයේ මෝඩම විධායක තීරණය බව බැනන් ප්‍රකාශකල බව මාධ්‍යවල වාර්තාවුනා.

බැනන්ගේ ක්‍රියාකලාපය තවදුරත් ඉවසන්නට නොකැමතිවූ ට්‍රම්ප් ඔහුව චීෆ් ස්ට්‍රැජටිස්ට් තනතුරෙන් හා ඒ සමගම ඔහුට හිමිවූ ආරක්ෂක කවුන්සිලයේ සාමාජිකත්වයෙන් ඉවත්කලා. එසේ ඉවත්කල පසු නැවතත්  තමන් සභාපතිත්වය දැරූ උග්‍ර දක්ෂිණාශික පුවත් වෙබ් අඩවියක් වන බ්‍රෙයිට්බාර්ට් අඩවියට නැවත පිවිසි ඔහු එහි සභාපතිලෙස පත්වුනා.

කෙසේ වෙතත් මේ වනවිට, ස්ටීන්වන් බැනන්ව එම තනතුරෙන් නෙරපා හැරීමට බ්‍රෙයිට්බාර්ට් අධ්‍යක්ෂක මණ්ඩලය තීරණය කොට තිබෙනවා. මෙයට හේතුව ට්‍රම්ප් පවුලේ අතිශය පුදගලික තොරතුරු, ධවල මණ්දිරයේ අභ්‍යන්තර ක්‍රියාකාරිත්වය පිලිබඳ එතරම් නිවැරදි නොවන තොරතුරු මෙන්ම ඉතාමත් අසම්භාවී මත ඉදිරිපත් කල "Fire & Fury" පොත ලිවීම සඳහා එහි කතෲ මයිකල් වුල්ෆ්ට තොරතුරු සියල්ලම ලබා දුන්නේ ස්ටීවන් බැනන් බව වුල්ෆ් ප්‍රකාශකිරීමත් සමගයි.

"Fire & Fury" පොතෙහි ඩොනල්ඩ් ට්‍රම්ප් ජනාධිපතිරයා හා ඔහුගේ සමීපතමයින් ඉතාමත් නිර්දය ලෙස මෙන්ම අසාධාරණ ලෙස විවේචනය කර තිබෙනවා. මේ තොරතුරු සියල්ලම මයිකල් වුල්ෆ්ට ලබාදී ඇත්තේ බැනන් විසින් බව දැන් තහවුරුයි.

මධ්‍යස්ථ විචාරකයින් සමහර ට්‍රම්ප් විරෝධීන් පවා ෆයර් ඇන්ඩ් ෆියුරි පොතෙහි හුවාදක්වන ආකාරයට ට්‍රම්ප් මෝඩ, මුඛරි, කිසිවක් බැරි අසහනකාරයෙක් ලෙස පෙන්වාදීම විශාල වැරැද්දක් බව පවසනවා. ට්‍රම්ප්ගේ වැරදි ඇතත් ඔහු මෝඩයෙකු හෝ පිස්සෙකු නොවන බවත් ප්‍රකෝටිපති ව්‍යාපාරයක් ගොඩනගාගත්, පලමු උත්සහයේදීම ජනධිපති පදවිය දිනාගත් දක්ෂයෙකු ලෙසයි ඔවුන් කියන්නේ.

එමෙන්ම ජෝර්ජ් W බුෂ් ජනපති පදවිය හොබවන කාලයේදී ඔහු පල් මෝඩයෙකු හා කිසිවක් නොදන්නා අඳ බාළයෙකු බවට බොහෝ දෙනා චෝදනා කල බවද පෙන්වා දෙන මේ විචාරකයින්, කරුණු එසේ බැවින් ට්‍රම්ප්ට විරුද්ධව නැගෙන චෝදනා බොහෝ ඇමරිකානු ජනාධිපතිවරුන්ට එල්ලවෙන චෝදනා මිස එයින් ප්‍රම්ප්ගේ පාලනය පඹගාලක් බව පැවසීම නිවැරදි නොවන බව පවසනවා.

එමෙන්ම මෑත ඉතිහාසයේ වඩාත්ම සාර්ථක රිපබ්ලිකන් ජනාධිපතිවරයා ලෙස සැලකෙන රොනල්ඩ් රීගන්, දේශපාලනය නොදන්නා පෙන්ෂන් ගිය නාකි නළුවෙකු බව පවසමින් ඔහුට දැඩි ලෙස අපහාස කලත්, ඉතිහාසය මගින් රොනල්ඩ් රේගන් සැබැවින්ම ඉතා සාර්ථක ඇමරිකානු ජනාධිපතිවරයෙකු බවත්, ඔහු නොබියව සෝවියට් දේශයේ බලපෑම් වලට මුහුණ දී එය විනාශ මුඛයට යවන්නට හැකි සෑම දෙයම කල බවත් ඔවුන් මතක් කරනවා.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Tuesday, 9 January 2018

BUSINESS : Cargills Plc පාලනාධිකාරිය, කරුණාකර ඔබලාගේ KFC ජාලයේ සිදුවන්නේ කුමක්දැයි සොයා බලන්න.

ලංකාව පුරා පැතිරෙමින් තියෙන ජාත්‍යන්තර ඉක්මණ් ආහාර (fast food) අවන්හල් ජාල අතරින් නිතරම බැනුම් අහන ජාලයක් තමයි KFC. ඒකට හේතුව බොහෝවිට පාරිභෝජනයට නුසුදුසු ආහාර අලෙවිය. 2014 අවුරුද්දෙත් පණුවන් සිටින බුරියානි විකුණලා තමුන්ගේ සන්නාමයට විශාල හානියක් කරගත්ත CARGILLS KFC මේ කරගෙන තියෙන්නේත් ඒවගේම මෝඩ වැඩක්.

මේ විධියට ලියනකොට වැරදි වැටහීමක් ඇතිවෙන නිසා පැහැදිලිවම කියන්න ඕනෑ මේ ලිපියේ අරමුණ හෝ මගේ පෞද්ගලික අරමුණ වෙන්නේ කාගිල්ස් සමාගම (හෝ සන්නාමය) හෝ කේ.එෆ්.සී සන්නාමය විනාෂ කිරීම නොවන බව. කාගිල්ස් කියන්නේ වසර සීයක් විතර පරණ, දහස් ගණනකට රස්සාදෙන, දහස් ගණනක් ගොවීන්ගෙන් හා දේශීය නිෂ්පාදකයින්ගෙන් නිෂ්පාදන මිළට ගන්න සමාගමක්. ඒවැනි සමාගම් වල වැරදි පෙන්වාදෙමින් අපි ඒවා ආරක්ෂාකරගත යුතුයි. 

රටක් දියුණු වෙන්නෙත්, ඒ රටේ මිනිස්සුන්ගෙ ජීවන තත්වය ඉහල නංවන්නෙත් ඒ රටේ ආණ්ඩුව නොව ඒ රටේ ලොකු කුඩා සමාගම් කියන දෙය මම දැඩි ලෙස විශ්වාස කරනවා. ලෝකෙ මිනිස්සු ජපාන ගැන දන්නේ ජපන් ආණ්ඩුව නිසා නෙමෙයි. ටොයෝටා, නිසාන්, සෝනි කොම්පැණි නිසා. කොරියාව ගැන මිනිස්සු දන්නේ සැම්සුන්ග්, හුන්ඩායි නිසා. ඉන්දියාව ගැන දන්නේ ටාටා නිසා. ඒකයි ඇත්ත. ඒ නිසා අපේ රටේ සමාගම් අපි ආරක්ෂාකරගත යුතුයි.




මේ වීඩියෝව බැලුවම, වගේම අවුරුදු තුනකට ඉස්සෙල්ලා වෙච්ච දේ බැලුවහමත් පේන දෙයක් තමයි කාගිල්ස් මගින් පාලනය වන කේ.එෆ්.සී අවන්හල්වල විශාල ගැටලු තියෙනවා කියන එක. මොනවද මේ ගැටලු?




1] පලමුවෙනි හා ප්‍රධානම දේ - පාරිභෝජනයට නුසුදුසු කෑම අලෙවිය. මේක මොනතරම් බරපතලද ඒවගේම නීති විරෝධීද කියලා කියන්න ඕනෙද? 

කාගිල්ස් කේ.එෆ්.සී මැනේජ්මන්ට් එකෙන් අහන්න ඕනෑ "මේ ජරා කෑම කාලා, KFC කන්න ආසාවෙන් එන පුංචි දරුවෙක් මැරෙන තෙක්ද බලාගෙන ඉන්නේ" කියලා?

මේ විධියට වගකීමක් නැතුව හදන ජරා කෑම කාලා දරුවෙකුට හරි වැඩිහිටියෙකුට හරි බරපතල අණතුරක් වුනොත් එදාට ලංකාවෙ කේ.ෆ්.සී බිස්නස් එක ඉවරයි. ඒවගේම කාගිල්ස් එකටත් ගොඩ එන්නේ ලැබෙන්නේ නෑ කියන එක කරුණාකරලා තේරුම් ගන්න. ලක්ෂ ගණන් වියදම් කරලා ප්‍රවර්ධනය කරන කාගිල්ස් සන්නාමය විනාශකර ගන්න එපා.

ඇන්කර් කිරි කොම්පැණියට ලංකාවේ වුනු දේ ගැන පොඩ්ඩක් මතක් කර ගන්න. හිතන්න එපා සෙල්ලමක් කියලා. පොඩි දරුවෙක් කෑම විසවෙලා මැරුණොත් එදාට සියල්ල අවසන් කියලා තෙරුම් ගන්න. එහෙම වෙන්න ඉස්සෙල්ලා රෙස්ටොරන්ට් ජාලයේ කොලිටිය හදාගන්න.

කරුණාකරලා වහාම කේ.එෆ්.සී රෙස්ටොරන්ට් වල කෑම උයන විධිය, කල්තබා ගන්න විධිය, පිලිගන්වන විධිය ගැන පූර්ණ හා ස්වාධීන විගණනයක් කරන්න. ඒ සඳහා අධ්‍යක්ෂක මණ්ඩළයේ ස්වාධීන අධ්‍යක්ෂකවරයෙකු පත්කරලා ඔහුට/ඇයට අධ්‍යක්ෂක මණ්ඩලයට පරිපූර්ණ KFC Food Quality Audit වාර්තාවක් ඉදිරිපත් කරන්න සලස්සන්න. මේ විධියට මළජරාව මිනිස්සුන්ගේ කෑම පිඟානට වැටුනේ කොහොමද කියලා හරියට හොයන්න. පැලැස්තර විසඳුම් දෙන්න එපා. ඔය රෙස්ටොරන්ට් එක වහලා මැනේජර් මෝඩයාව අස්කලා කියලා ලංකාවේ කේ.එෆ්.සී කොලිටිය හැදෙන්නේ නෑ.

ලංකාවේ කේ.එෆ්.සී අවන්හල්වල බරපතල කොලිටි ප්‍රශ්ණ තියෙනවා. සමහර ඒවාවල චිකන් හරියට තැම්බිලා නෑ. කනකොට තේරෙනවා අමුයි කියලා. තව සමහර ඒවාවල උදේ බැදපු චිකන්, ආයෙ බැදලා හවසට දෙනවා. කනකොට රබර් වගේ හයියයි. 

කේ.ෆ්.සී රෙස්ටොරන්ට් මැනේජර්ලා වගේම ප්‍රඩක්ට් කොලිටිය බාර ලොක්කොත් දැන ගන්න ඕනෑ, කේ.ෆ්.සී කන්න එන්නේ චිකන් කාපු නැති මිනිස්සු නෙමෙයි කියලා.  ඒවගේම කේ.එෆ්.සී එකේ දෙන ෆ්‍රෙන්ච් ෆ්‍රයිස් තත්වෙන් අන්තිම බාලයි. 

මේවා හරියට හදාගන්න බැරිනම් කාගිල්ස් කොම්පැණිය කේ.එෆ්.සී බිස්නස් එක විකුණලා දාන්න.

2] දෙවැනි ගැටලුව - පුහුණුවක් හා විනයක් නැති කළමණාකරුවන් යෙදවීම - මේ කළමණාකාර ගැටයා හැසිරෙන්නේ අන්තිම ගොනෙක් විධියට. මෙයාව මැනේජර් කෙනෙක් විධියට සුදුසුයි කියලා පත්කරපු කෙනාගෙන් වහාම නිදහසට කාරනා විමසන්න ඕනෑ මේ වගේ නොහික්මුණු, නුපුහුණු කොල්ලෙක්ව ජාත්‍යන්තර සන්නාමයක මැනේජර් කෙනෙක් බවට පත්කලේ මොන පදනමකින්ද කියලා. 

මේ මෝඩයට තේරුම් යන්න ඕනෑ මිනිහෙකුට කන්න බැරි ජරා කෑමක් දුන්නට පස්සේ ඒ මනුස්සයාට කේන්ති යන එක සාධාරණයි කියන එක.

මෙහෙමද KFC මැනේජර්ලා හැසිරෙන්නේ?

නම ඇහුවම කියන්නේ නෑ. නරිප්පඩකමට ශර්ට් එකේ තියෙන නේම් ටැග් එක පෙන්වනවා. ගණුදෙනුකරුවෙක්, ගැටලුවක් නිසා තමන් ගණුදෙනු කරන සමාගම් සේවකයාගේ නම ඇහුවම නිවැරදිව සම්පූණ නම කියන්න ඔවුන් බැඳිලා ඉන්න බව මේ මෝඩයා දැනගන්න ඕනෑ. නැතිනම් ඒක ඔලු කට්ටට කාන්දුවෙනකම් හරියට මොවුන්ව ට්‍රේන් කරන්න ඕනෑ.

වැරද්ද පිලි ගන්නෙම නෑ. ලේ පෙරෙන බාගෙට ඉදිච්ච ජරාව දිහා බල බල ඕනෙ නම් රිෆන්ඩ් එකක් දෙන්නම් කියන්නේ මොහුගේ උපන් ගොන් කමට වෙන්න ඇති.

වැරැද්දක් ඇත්තටම වෙලානම්, නැතත් අහේතුකව හරි ගණුදෙනුකාරයෙකුට කේන්ති ගියාම හරි වැරැද්ද කාගේ වුනත් සේවකයා ගණුදෙනුකාරයාගෙන් සමාව ඉල්ලා සිටීම සමාගම් සේවකයෙකු දැන ගන්නම ඕනෑ දෙයක්. මේක පාරිභෝගික සේවා සැපයීම් පුහුණුවේදී (customer service training) අනිවාර්යයෙන්ම උගන්වන සිද්ධාන්තයක්. වැදගත් දේ කවුද හරි, කවුද වැරදි කියන එක නෙමෙයි. ඒක පස්සේ බේරගන්න පුලුවන්. 

ඉස්සෙල්ලාම කරන්න ඕනෑ ගණුදෙනුකාරයාගේ කෝපය නිවෙන විධියට, ආවේගය අඩුවෙන විධියට කතාකිරීම. ඒකයි සමාව ඉල්ලන්න ඕනෑ කියන්නේ. වැදගත් විධියට වැරැද්ද පිලිඅරගෙන සමාව ඉල්ලලා, ආයෙ මෙහෙම දේවල් නොවෙන බවට මැනේජර් විධියට වගකීම ගන්නවා කියලා කිව්ව නම් මේ වැඩේ හිට්ස් 100,000 පැණපු වීඩියෝවක් වෙන එක වලක්වා ගන්න තිබුණා. 

ඒ මදිවට ඕනේ නම් රීජනල් මැනේජර්ට කොම්ප්ලේන් කරන්න කියනවා. ඒකෙන් මේ මෝඩයා අහක යන රීජනල් මැනේජර්වත් මේකට ගාව ගන්නවා. එදා චිකන් බැදලා තියෙන්නේ මේ රෙස්ටොරන්ට් මැනේජර් යටතේ ඉන්න ගෝලයෙක් නෙමෙයි, රීජනල් මැනේජර් වෙන්න ඇති. 

Cargills-KFC සමාගම රෙස්ටොරන්ට් මැනේජර්ලා විධියට මෙවැනි ටයි දාගත් ගවයන් යෙදවීම වහාම නවත්වන්න ඕනෑ. මේ රෙස්ටොරන්ට් ගැන නිතර හොයලා බලන්න හොඳට පුහුණු වුනු, ප්‍රොෆෙෂනල් මැනේජර්ලා යොදවන්න. දෙකයි-පනහේ ගැටවුන්ට මේවා බාරදෙන්න එපා.

3] තුන්වන ගැටලුව - කස්ටමර් සර්විස් හරියට උගන්වා නැතිවීම
කස්ටර්මර් සර්විස් දියුණු කරනවා කියන්නේ වැඩමුළුවකට යවලා සහතිකයක් දෙන එක නෙමෙයි. උගන්නපු දේවල් හරියට ක්‍රියාත්මක වෙනවාදැයි සොයා බලන්නත් ඕනෑ. ඒ සඳහා McDonald's. Burgher King වගේ ජාල වෙනම දෙපාර්තමේන්තු ඇතිකරලා තියෙනවා. ඒ දෙපාර්තමේන්තු සේවකයින් ලෝකේ පුරාම තියෙන තමන්ගේ රෙස්ටොරන්ට් වලට ගිහිල්ලා, පාරිභෝගිකයෝ වගේ පෙනී සිටලා, ආහාරවල තත්වය, සේවාවේ තත්වය, පිරිසිදුකම  වගේ දේවල් බොහොම සියුම්ව විගණනය කරනවා. ඒ වාර්තා අසතුටුදායක නම් වහාම නිවැරදි කරන්න ක්‍රියාමාර්ග ගන්නවා. සේවකයින් නැවත පුහුණු කරනවා. මැනේජර්ලා මාරු කරනවා.

ඒවගේම වෙනම market research සමාගම් එක්ක ගිවිසුම් ගත වෙලා තියෙනවා නිතරම තමන්ගේ රෙස්ටොරන්ට් ගැන ඇහ ගහගෙන ඉන්න. මිනිස්සු මොනවද කියන්නේ කියලා හොයන්න. මොනවද වෙන්නේ කියලා රහසින් සොයලා බලලා වාර්තා කරන්න.

කාගිල්ස් එකත් මේවගේ දේවල් කරනවා ඇති. හැබැයි නමට විතරයි වගේ තමයි පේන්නේ. ඒ ව්‍යායාමය සම්පූර්ණයෙන්ම ෆේල් කියලා දැන්වත් දැන ගන්න.



__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 7 January 2018

HISTORY : කැරිබියන් මුහුද දෙවනත් කල කුප්‍රකට Pirates of the Caribbeanලා පොත් කියවපු බව හෙලිවෙලා!


පයරට්ලා නැතිනම් මුහුදු කොල්ලකරුවන් කියපු ගමන් මතක් වෙන්නේ පයරට්ස් ඔෆ් ද කැරිබියන් චිත්‍රපටවල ඉන්න ජැක් ස්පැරෝ චරිතයයි ඔහුගේ ගෝල පිරිසයි. නූගත්, කපටි, කුරිරු ගති ඇති ඔවුන් ඉතා අපිරිසිදු ජීවිත ගතකරන බවත්, නිතරම  කට ගොන්නක් බීගෙන ගණිකා නිවාසවල ඉන්න බවත්, මුහුදේදී නිරායුධ යාත්‍රාවලට පහරදීලා ඒවා යේ වස්තුව කොල්ල කාලා නැවියන් මරා දමන බවත් මේ චිත්‍රපටවල පෙන්වනවා. මුහුදු කොල්ලකරුවන් ගැන ලියවුනු පොත්, හැදුනු වෙනත් චිත්‍රපටවලත් ඔවුන්ව පිලිඹිඹු කරන්නේ මීට සමාන ආකාරයකටමයි. 

ඒත් වසර සිය ගණනකට කලින් ජීවත්වුනු සැබෑ මුහුදු කොල්ලකරුවන් ඇත්තටම මේ වගේද?

කැරිබියන් දූපත්වල සිය අණසක පතුරුවාගෙන සිටිය සැබෑ ලෝකයේ මුහුදු කොල්ලකරුවන් ගෙන් කුප්‍රකටම මුහුදු කොල්ලකාරයා වෙන්නේ කළුරැවුළා හෙවත් බ්ලැක් බියර්ඩ්.

1680දී ඉපදුනු බ්ලැක්බියර්ඩ්ගේ නියම නම එඩ්වර්ඩ් ටීච්. එන්ගලන්ත ජාතිකයෙකු වූ ඔහු බටහිර ඉන්දීය දූපත් හා ඉන් උතුරේ ඇති ඇමරිකාවේ නැගෙනහිර වෙරළේ කොල්ලකෑම්වල නිරතවුනා.එඩ්වර්ඩ් ටීච්ගේ ළමා කාළය ගැන තොරතුරු නැති අතර ඔහු ප්‍රසිද්ධ වෙන්නට ගත්තේ කොන්කෝර්ඩ් නම් ප්‍රංශ නෞකාවක් අත්පත්කරගෙන එයට කාලතුවක්කු 40ක් සවිකරලා මහා බලසම්පන්න යුධ යාත්‍රාවක් බවට හරවාගත්තට පස්සේ. මේ නෞකාව  "Queen Ann's Revenge" නැතිනම් ඈන් රැජිණගේ වෛරය කියලා භෞතීස්ම කරගත් එඩ්වර්ඩ් ටීච්ට, බ්ලැක්බියර්ඩ් නම පටබැඳුනේ ඔහුගේ බියකරු පෙනුම හා විශාල රැවුළ නිසා බව කියැවෙනවා.


බ්ලැක්බියර්ඩ් ගැන ලියවී ඇති සත්‍ය ඉතිහාස කරුණුවල, ඔහු කුරිරු මිනිසෙක් බව පෙන්වන්නේ නෑ. බ්ලැක්බියර්ඩ් සිය කොල්ල කල්ලිය පාලනය කරන්නට සාමූහික එකඟතාවය භාවිතාකල බව තමයි කියැවෙන්නේ. ඒ වගේම නිරපරාදේ මිනිසුන් මරාදමනවා වෙනුවට තම ග්‍රහණයට හසුවෙන නෞකා කප්පිත්තන් ලවා සිතැඟි කරවා ගන්නට ඔහු සිය භයානක ප්‍රතිරූපය  භාවිතාකලා කියලත් කියවෙනවා.






පයරට්ස් ඔෆ් ද කැරිබියන් චිත්‍රපට මාලාවේ "On Stranger Tides" චිත්‍රපටයේ බ්ලැක්බියර්ඩ් හා ඔහුගේ දියණිය  ඇන්ජෙලිකා (ඔහුට සැබෑවටම දියණියක් සිටි බවට ඉතිහාස සටහන් නෑ) ප්‍රධාන චරිතවලට පණපොවනවා. මේ චිත්‍රපටයට අනුවනම් බ්ලැක්බියර්ඩ් ඉතාමත් රුදුරුවන අතර පසුව අමනුෂ්‍යයෙක් බවට පත්වනවා. ඔහුගේ දියණියත් ඉතාම චපල, කලක් ගණිකාවක් ලෙස කටයුතුකල, සිය පියා හා එක්වීමෙන් පසු ක්වීන් ඈන්ස් රිවෙන්ජ් නෞකාවේ දෙවැනි නායකයා (first mate) ලෙස පත්වනවා.

කෙසේ වෙතත් බ්ලැක්බියර්ගේ ක්වීන් ඈන්ස් රිවෙන්ජ් නෞකාව 1996 වසරේදී උතුරු කැරොලයිනා වෙරළට ඔබ්බෙන් ගිලීගොස් තිබියදී හමුවුනා. මෙය ගිලීගියේ 1718දීයි.






මේ නෞකාවේ කෞතුක වස්තූන් පරීක්ෂාකරමින් වසර ගණනාවක් ගතකල සමුද්‍ර ඉතිහාසඥයින්ට මේ නැවේ තිබී විනාශ නොවූ කඩදාසි කිහිපයක් හමුවී තිබෙනවා. එම කඩදාසි පරීක්ෂාකල පුරාවිද්‍යාඥයින්ට ඒවා බ්‍රිතාන්‍ය දේශගවේෂක කැප්ටන් එඩ්වර්ඩ් කුක් විසින් ලියන ලද  "A Voyage to the South Sea, and Round the World, Perform’d in the Years 1708, 1709, 1710 and 1711" පොතෙහි පිටු බවට දැන් සැක රහිතවම සනාතවෙලා තියෙනවා.

මේ පිටු 1712දී පලවුනු කැප්ටන් කුක්ගේ පොතෙහි පළමු මුද්‍රණයේ පිටු බවටයි තහවුරු වෙලා තියෙන්නේ. ඒ අනුව බ්ලැක් බියර්ඩ් රුදුරු ලේ පිපාසිත නූගතෙකු නොව පත-පොත කියවූ තැනැත්තෙක් වියයුතු බවටයි දැන් අනුමාන වෙන්නේ.

බ්ලැක්බියර්ඩ්ගේ අවසානය සිදුවුනේ 1718දී. ක්වීන් ඈන්ස් රිවෙන්ජ් නෞකාව ගිලීගිය පසු බ්‍රිතාන්‍යයට ගිය ඔහු මාස කිහිපයකින් නැවතත් කැරිබියන් සාගරයට යන්නේ පරණ මුහුදු මංකොල්ල රැකියාව කරන්නට. එහෙත් එහිදී ඔහු එකල ඇමරිකාවේ වර්ජීනියා ප්‍රාන්තයේ ආණ්ඩුකාර ඇලෙක්සැන්ඩර් ස්පොට්ස්වුඩ්ගේ උදහසට ලක්වෙනවා. ඒ අනුව ඔහුව මරාදැමීමට දක්ෂ කුඩා නැවියන් කණ්ඩායමක් යොදවන අතර 1718 නොවැම්බර් 22වැනිදා සිදුවූ දරුණු අසිපත් සටනකින් පසු ඔහු මිය යනවා.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

ARE U SERIOUS? : ලොව පැරණිම හා විශිෂ්ඨම S.A.S විශේෂ බළකාය Combat Missions වලට කෙල්ලන් ගන්න යයි!

SAS ට්‍රේනින් ගිය කෙල්ලෝ
නූතන විශේෂ බළකා ඉතිහාසය ආරම්භ වෙන්නේ දෙවන ලෝක යුද්දෙ කාලෙ බ්‍රිතාන්‍යයෙන්. එකල බ්‍රිතාන්‍ය අග්‍රාමාත්‍ය වින්ස්ටන්ට් චර්චිල්, සතුරු බිම් පෙදෙස් වලට රහසින් ඇතුලුවී දැඩි විනාශයන් සිදුකල හැකි විශේෂ සෙබලුන් කණ්ඩායමක් නිර්මාණය කරන්න කියලා බ්‍රිතාන්‍ය ආරක්ෂක අමාත්‍යාංශයට දීපු නියෝගයක් බ්‍රිතාන්‍ය කොමාන්ඩෝ ඒකක පිහිටුවීමට මුල්වුනා කියලා කියනවා. මේ අනුව ලෝකයේ පලමුවෙනි විශේෂ බළකාය වන Special Air Service (SAS) රෙජිමේන්තුව 1941දී ආරම්භ වෙනවා.

SAS කොමාණ්ඩෝ රෙජිමේන්තුවේ පලමුවෙනි මෙහෙයුම සිදුවන්නේ 1941 නොවැම්බරයේදී. ඒ නට්සීන්ට විරුද්ධව උතුරු අප්‍රිකාවේදී ආරම්භ කරපු Operation Crusader ක්‍රියාන්විතයට සහය මෙහෙයුමක් විධියට. මේ මෙහෙයුම සම්පූර්ණයෙන්ම අසාර්ථක වෙලා මෙහෙයුමට සහභාගීවුනු 60 දෙනාගෙන් 22නෙක්ම මිය යනවා. හැබැයි 1942 සැප්තැම්බරයේදී ලිබියාවේ ජර්මන් ගුවන් කඳවරු වලට අනපේක්ෂිත අවස්ථාවක එල්ලකල SAS දෙවන ප්‍රහාරය ඉතාමත් සාර්ථක වුනා. මෙහිදී ජර්මන් ගුවන්හමුදාවේ ප්‍රහාරක යානා 60ක් විනාශකරන්න ඔවුන් සමත්වුනා.

නිළ වශයෙන් 22nd Special Air Service Regiment ලෙසින් හඳුන්වන SAS රෙජිමේන්තු ස්වක්ඩ්‍රන් (භට සමූහ) 4කට බෙදා ඇති අතර සෑම ස්වක්ඩ්‍රනයක්ම මේජර්වරයෙකු යටතේ ක්‍රියාත්මකවේ. එක් ස්වක්ඩ්‍රනයක කපිතාන්වරුන් 4 දෙනෙකු සිටින අතර එක් කපිතාන්වරයෙකු යටතේ භටයින් 15 දෙනෙකුගේ කණ්ඩායමක් ක්‍රියාත්මකවේ.  





 
SAS සෙබලුන්ට මූලික කොමාන්ඩෝ පුහුණුවට අමතරව අංශ 4කින් එක් අංශයක විශේෂ පුහුණුවක් ලබාදෙනවා.

1]  Boat Troop - මොවුන් ජලාශ්‍රිත හා කිමිදුම් මෙහෙයුම් සඳහා විශේෂ පුහුණුවක් ලබන අතර.  සෙබලුන් බොහෝවිට බ්‍රිතාන්‍ය නාවික හමුදාවේ Special Boat Service (SBS) නාවික කොමාන්ඩෝ ඒකකය සමග පුහුණුවීම් වල යෙදෙනවා.

2] Air Troop - ඉතා ඉහලින් යන ගුවන්යානාවලින් (high altitude) පැරිෂූට් පැනීම් වලට විශේෂයෙන් පුහුණුවන මොවුන් High Altitude Low Opening (HALO) හා High Altitude High Opening (HAHO) ආකාරයේ පැරිෂූට් පැනීම් වලට දක්ෂයින් වනවා.

3] Mobility Troop – කාන්තාර හා දිගුදුර වාහන මෙහෙයුම් වලට විශේෂඥයින් වන මොවුන් අතර ඉතාමත් ඉහල පුහුණුවක් ලැබූ මෝටර් කාර්මිකයින්ද සිටිනවා. ඕනෑම ආකාරයට වාහන ආපදාවකදී අලුත්වැඩියා සිදුකිරීමට මොවුන් දක්ෂයින් වනවා.

4] Mountain Troop -  - අධික ශීතලෙන් යුතු ධ්‍රැවාශ්‍රිත ප්‍රදේශවල මෙහෙයුම් හා දුෂ්කර කඳුකර ප්‍රදේශවල මෙහෙයුම් කිරීමට විශේෂ පුහුණුවක් ඇති මොවුන් කඳුනැගීමට හා හිම මත මෙහෙයුම් කිරීමට දක්ෂයින් බව පැවසෙනවා.
 





මෙවැනි දුෂ්කර මෙහෙයුම් වලට පුහුණු කරවන SAS බළකාය සඳහා තරුණියන් බඳවා ගැනීම සඳහා මේ දිනවල මූලික ශාරීරික ‍යෝග්‍යතා පුහුණුවීම් (physical fitness training) සිදුකරමින් සිටින බවයි බ්‍රිතාන්‍යයෙන් වාර්තාවන්නේ.



මේ තීරණයට සමහර SAS නිළධාරීන් විරුද්ධ බවයි පැවසෙන්නේ. කාන්තාවන් සහභාගීවන මෙහෙයුම් ඒ නිසාම අසාර්ථක වියහැකි බව ඔවුන් පවසනවා.

එහෙත් SAS නිළධාරීන් හා ජ්‍යේෂ්ඨයින්ගෙන් වැඩි ප්‍රතිශතයක් මේ තීරණයට සහය පලකරනවා.  බ්‍රිතාන්‍ය MI6 ඔත්තුසේවයේ කාන්තා ඔත්තුකාරියන් සමග දුෂ්කර මෙහෙයුම් වල යෙදී ඇති SAS නිළධාරීන්, කාන්තාවන්ට පිරිමින්ට කල හැකි ඕනෑම දුෂ්කර මෙහෙයුමක් සිදුකිරීමට හැකියාව ඇතැයි ප්‍රසිද්ධියේ පවසන්නේ ඔවුන්ට ලැබී ඇති අත්දැකීම් අනුවයි. සමහර අවස්ථාවලදී කාන්තාවන් සමග මෙහෙයුම් කිරීම පිරිමින් සමග මෙහෙයුම් කරනවාට වඩා පහසුයි කියලත් කාන්තා ඒජන්තවරියන් සමග රහස් මෙහෙයුම් වල යෙදී පලපුරුද්ද ඇති SAS ජ්‍යේෂ්ඨයින් පවසනවා.






__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Saturday, 6 January 2018

MEDIA : විනාඩියේ ඩාන්ස් එකෙන් රනිල් යලි හදාගත් ප්‍රතිරූපේ හා සිරසේ ෆේල්වීම




මාධ්‍ය; විශේෂයෙන්ම  රූපවාහිණී මාධ්‍ය හිතාගෙන ඉන්නවා එයාලට මිනිස්සුන්ගේ ප්‍රතිරූප මවන්න වගේම නැතිකරලා දාන්නත් පුලුවන් කියලා.

විශේෂයෙන් සිරසෙ ඉන්න අධිමාන්නෙන් පෙලෙන මැදිවියේ ගැටව්, කිලීගේ සල්ලි බලේ නිසා හිතාගෙන ඉන්නේ ශිව දෙවියෝ වගේ සියල්ල මවන්නෙත්, නැති කරන්නෙත් තමුන් කියලා.

ඒත් ප්‍රතිරූප මැවුම්කරණයේදී වගේම නාෂනයේදීත් සිරස හැමදෑම ෆේල්

සිරස මවපු අය බලමු. කෝ දැන් ඔය සිරස සුපර් ස්ටාර්ලා? එයලා තනිකරම සෙලියුලොයිඩ් මවා පෑම් . විතරයි. හරියට දියත උයනේ මල්පැල කඩවල්වල හෝමෝන් ගහලා, පෝර විදලා විකුණන මල් පැල වගේ. ගන්නකොට මල් පිපී හිනැහෙන ලස්සන පැල. ගෙදර ගෙනල්ලා හිටවල සති දෙකෙන් මල් හැලිලා, කොළ ඇකිලිලා මැරිලා යනවා. නැතිනම් මාස ගාණක් කනාටු වෙවී තියෙනවා ගලවලා වීසිකරනකන්.





සිරස මවපු සුපර්ස්ටාර්ලා බුරුත්තම දැන් මොකද කරන්නේ? දැන් සංගීතෙක සින්දුවක් කියාගෙන ඉන්නවා මිසක් කෝ එයාලගෙ සුපිරි තාරකා හේලෝව? ටික කාලෙකට හරි ඉස්සරහ ඇවිල්ලා හිටියේ  ශිහාන් විතරයි. ඒත් ඌ දිනපු එකා නෙමෙයි. පැරදුන එකා.

සිරස මවපු දේශපාලන ප්‍රතිරූපත් එහෙමමයි. මරික්කාර්ලා, කිඳෙල්පිටියලා, ශ්‍රී රංගලා තුන්වෙනි පෙල රොඩු මිසක් ජාතික නායකයෝ නෙමෙයි. කවදාක්වත් ජාතික නායකයන් වෙන්නත් බෑ.

කාලයක් ජේවීපී එකට උඩ පැන පැන ගැහුවා. ජේවීපී එකේ නායකයෝ බූරුවන්ට අන්දලා කොළඹ ලොකු ලොකු කට් අවුට් ගැහුවා. ජේවීපී එක තාම හොඳින් තියෙනවා.

කාලයක් සිරස රනිල්ව පිම්බුවා, 2005 ජනාධිපතිවරෙණෙදි සිරස සරම කරට අරගෙන රනිල්ට වැඩකරා. මහින්දට දිගට හරහට ගැහුවා. මහින්ද දිනුවා. රනිල් පැරදුනා, සිරසත් පැරදුනා. කොටි සිරස කියලා කටු ඔටුන්නකුත් දාගත්තා. ඊට පස්සේ රනිල්ව පන්නලා මහාරාජා පදයට නටන කෙනෙක්ව ලංකාවේ විශාලම, පැරණිම දේශපාලන පක්ෂෙ නායකයා කරන්න සිරස අවුරුදු ගාණක් දැඟලුවා. ඒත් රනිල්ව පන්නන්න බැරිවුනා. දිනන්න බැරියි කියලා සිරස කියපු රනිල් මහින්ද නැමති පතාක යෝධයාව පරද්දලා, තමුන් කැමති කෙනාව ජනාධිපති පුටුවේ ඉන්දලා අගමැතිවුනා.

දැන් සිරසෙ ට්‍රයි එක එහෙව් අගමැති හිරේ යවන්න, නැතිනම් ගෙදර යවන්න. බැඳුම්කර කොමිසමෙන් වැඩේ ටක්කෙටම වෙයි කියලා හිතාගෙන කේජුකෑල්ල දැකලා කෙළපෙරපු නරියා වගේ නටන්න ඕනෑ ඔක්කොම නැටුම් නැටුවා. ටයිකෝට් දාගෙන ඉන්ටර්විව් කරා. "වීශේෂඥයින්" ගෙනල්ලා ඇත්ත ඇති සැටියෙන්ම ජනතාවට පෙන්නනවා කිව්වා. ප්‍රධාන පුවත් විකාශ හැම එකක්ම රනිල්ට ගහන ෂෝ එකක් කරගත්තා. ඒත් අවසානේ මොකද වුනේ?

දැන් බලන්නේ රනිල්ගේ ඩාන්ස් එකට හිනාවෙලා හරි හෙලුව වහගන්න.




සිරස රූපවාහිණී විනාඩි දහස් ගණනක් වැයකරලා නැතිකරපු රනිල්ගේ ප්‍රතිරූපෙ මිනිහා අයිරාංගණී සේරසිංහ මැතිණිය එක්ක කොල්ලෙක් වගේ කොමික් ඩාන්ස් එකක් දාලා හදාගත්තා. ඒකට බණින, හිනාවෙන මිනිස්සුත් ඇති. එත් ඒ විනාඩියේදී රනිල් පෙන්නුවා එයත් අනිත් හැමෝම වගේ මනුස්සයෙක් කියලා. 

සිරසෙ පැයණන් බැනපුවට වඩා ඒක මිනිස්සුන්ගෙ හිතට වදිනවා. අඩුම ගානේ යු.එන්.පී කාරයෝ හරි බණින එක අඩුකරලා "මොනවා වුනත් ආතල් ඩාන්ස් එක බන්" කියනවා. සිරසෙ ප්ලෑන් ආයෙ ෆෙල් වෙනවා. තවත් ප්‍රයිම් ටයිම් නිව්ස් වෙලාව විනාඩි දාහක් දෙදහක් රනිල්ට  වැය කරලා බණින්න වෙයි රනිල් ආයෙත් ටිකක් වට්ටන්න.

කණගාටුවෙන් වුනත් කියන්න තියෙන්නේ ලංකාවේ මීඩියා කියන්නේ ජන මතය හදන, හරවන, වෙනස් කරන සාධකයක් නෙමෙයි කියන එක. සිරසලා, දෙරණලා කොච්චර නැටුවත් රටේ ජනමතය වෙනස් කරන්න බෑ. ආණ්ඩු හදන්නත් බෑ. පෙරලන්නත් බෑ. 

එහෙම වෙන්නේ රටේ වාසනාවට. එදා සිරස මහින්දට ගහපු හැටියට මහින්ද පැරදුනානම් අදත් ප්‍රභාකරන් මේ රටේ ජීවත්වෙන්නේ කවුද, මැරෙන්නේ කවුද, කවද්ද කියන එක කිලිනොච්චි කැලේ සැප බංකරේ ඉඳගෙන තීන්දු ගන්නවා. ප්‍රභාකරන් පුපුරවන හැම බෝම්බෙකම මැරිච්ච ගාණ සිරසෙන් විනාඩි පහෙන් පහට ලයිව් දෙනවා.

රනිල් ගෙදර යනවාද, මෛත්‍රී ගෙදර යනවාද කියලා තීරණය කරන්නේ මේ රටේ මිනිස්සු මිසක් සිරසේ කිලීගෙ සල්ලිවත්, හිරු එකේ රේනර්ගේ සල්ලිවත්, ඉච්ඡාභංගත්හ්වයෙන් පෙලෙන අද දෙරණෙ සෙට් එකවත් නෙමෙයි.

ලංකාවේ මාධ්‍ය කියන්නේ මිලක් තියෙන තවත් වෙළඳපොල සේවාවක් විතරයි. කැමති අය ගන්නවා. අකමැති අය වෙන දේවල් ගන්නවා. කාටවත් මොනෝපොලි නෑ. ඒක තේරුම්ගන්න තරමට එයාලාට හොඳයි. නැතිනම් සිහින ලෝකවල ජීවත් වෙවී තවත් චාටර් වෙනවා.





__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Wednesday, 3 January 2018

SCIENCE FICTION : ලඟදීම එනවා!!!! Mutant Forest | විකෘත වනාන්තරය


“1916 මාර්තු 20 වැනිදා කලබින්න කැලෑවේ පෞරාණික දේවාල භූමිය ගවේෂණය කිරීම සඳහා පිටත්ව ගිය බ්‍රිතාන්‍ය ජාතික පුරාවිද්‍යාඥ රොබර්ට් ඩේවිස්, ඔහුගේ බිරිඳ හා පර්යේෂණ සහයිකාව වූ මැටිල්ඩා ඩේවිස්, විනෝදයට සතුන් දඩයමේ යෙදුනු බ්‍රිතාන්‍ය ජාතික තේ වැවිලිකරුවෙකු වූ ස්ටීවන් ෆ්ලෙමින්ග් හා එම කණ්ඩායමේ කුලීකරුවන් ලෙස ගමනට සභාගීවූ ද්‍රවිඩ හා සිංහල ජාතිකයින් දොලොස් දෙනෙකු ආගිය අතක් නොමැතිව අතුරුදහන්වූ බව ජාතික ලේඛණාගාරයේ සුරක්ෂිතව ඇති පැරණි පුවත් පත් වාර්තා පරීක්ෂාකල කොළඹ විශ්වවිද්‍යාලයේ කථිකාචාර්ය චන්ද්‍රසෝම සෙනෙවිරත්න මහතා පවසනවා.."

"පර්යේෂණ කෘතියක් සඳහා පැරණි පුවත්පත් වාර්තා පරීක්ෂාකරමින් සිටි ඒ මහතාට මෙම පුවත් පත් වාර්තා හමුවී ඇති අතර දැනට කලබින්න වනයේ උද්ගත වී ඇති තත්වය නිසා වහාම මේ පුවත් පත් වාර්තාවල පිටපත් ලබාගෙන බලධාරීන් වෙත යැවූ බව සෙනෙවිරත්න මහතා පවසනවා..."
කලබින්න වනයට ගිය හමුදා අණුඛණ්ඩය අතුරුදහන්!!! - ලංකා පුවත්

“පසුගිය දා කලබින්න වනය තුල සිදුවූ අභිරහස් සිදුවීම් ගැන සොයාබැලීම සඳහා වනය තුලට පිවිසි අනූදෙනෙකුගෙන් සමන්විත හමුදා අණුඛණ්ඩයෙන් ලැබෙමින් තිබූ රේඩියෝ පණිවිඩ ඊයේ රාත්‍රියේ සිට ඇණහිට ඇති බව හමුදා මූලස්ථානය වාර්තා කරනවා.

මෙම භට පිරිස සමග වනජීවී දෙපාර්තමේන්තුවේ අඩවි නිළධාරීන් සිවුදෙනෙකු හා වන සංරක්ෂණ දෙපාර්තමේන්තුවේ බීට්ටු නිළධාරීන් දෙදෙනෙකු පිටත්ව ගියේ පෙරේදායි. පාන්දර හයට ඔවුන් වනය තුලට පිවිසි බවත්, පෙරේදා සවස් වනවිට ඔවුන් පැරණි දේවාලය අසලට පිවිසීම සඳහා වනය එලි පෙහෙලි කරමින් ගමන් කරමින් සිටි බවත් වාර්තා වුනා..."

__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________

Sunday, 31 December 2017

GOODBYE 2017 : පරණ අවුරුද්ද කොහොමද?



මේ ලිපිය පලවෙනකොට 2017 අවුරුද්ද ගෙවිලා අවසන් වෙන්න පැය කිහිපයක් පමණක්  තියේවි. 2017 අවුරුද්ද කොහොම ගෙවුනද කියන එකේ ප්‍රත්‍යාවලෝකනයක් කරන ගමන් 2018 අවුරුද්දේ දේශපාලන, ආර්ථික, ශ්‍රම වෙළඳපොල හා සමාජීය තත්ව කොහොම වෙයිද කියලා හිතන්න කාලය ඇවිත්.

2017 ප්‍රත්‍යාවලෝකනය

2017 අවුරුද්ද දේශපාලන වශයෙන් ගත්තම එතරම් වැදගත් කිසිවක් සිදු නොවුනු අවුරුද්දක්. පොහොය දෙකක් ගෙවිලා, ආණ්ඩුව පෙරලෙයි කියලා හිතුවත්, ඉක්මණටම ඒක වෙසක් පෝය දෙකක් වුනා. ඒවගේම මහින්ද රාජපක්ෂ මහත්තයා දේශපාලන වශයෙන් දියවෙලා ගිය වසරක් විධියටත් 2017 හිතන්න පුලුවන්. මහින්ද මහත්තයාට අවුරුද්ද පටන් ගන්න කොට තිබුණු ප්‍රභාව අවුරුද්ද ගෙවන කොට නැතිවෙලා ගිහින්.

ඒකෙ වගකීම ගන්න ඕනෑ එතුමාමයි. හිටපු රාජ්‍ය නායකයෙක් විධියට වගේම හැමෝම දිනන්න බෑ කියපු යුද්ධයක් දිනන්න නායකත්වය දිලා දැවැන්ත ජාතික නායකයෙක් වුනු එතුමා වගකීමෙන්,  ප්‍රවේසමෙන්, ඉවසීමෙන් වැඩ කරන්නේ නැතුව මුරලිදරන් වගේ බැට් කරන්න යාම එතුමාගේම වටිනාකම අඩුවෙන්න හේතුවෙලා. එතුමාට බලය ගන්න තියෙන හදිස්සිය, ජනතාවට නෑ කියලා ඔප්පුවෙලා තියෙනවා කියලයි මට හිතෙන්නෙ. මේකෙන් කියන්නේ නෑ මහින්ද මහත්තයා ඊලඟ චන්දවලදී විශාල සාධකයක් නොවේ කියලා. ඒත් එතුමා හිතන තරම් ඉක්මණට ආණ්ඩුව වැටෙන්නේවත්, ආණ්ඩු වට්ටන්න ජනතාව බෙල්ල කඩාගෙන ට්‍රයි කරන්නේ නැති බවත් 2017 වසර තුල ඔප්පුවුනා කියලා මට හිතෙනවා.

මහින්ද මහත්තයාගේ උදව්වක් නැතුවම වුනත්, 2017 අවුරුද්දෙ රනිල්-මෛත්‍රී ආණ්ඩුවත් අතේ තියෙන තුවක්කුවෙන් තමුන්ගෙම කකුල් වලට වෙඩි තියාගෙන තියාගෙන ගියා කියලා හිතෙන තරම ළදරු දේශපාලනයක නිරතවුනා කියලා කියන්න පුලුවන්. රවී කරුණානායක මුදල් ඇමතිකමෙන් පන්න ගත්ත එකනම් ආණ්ඩුව ලැබූ ජයග්‍රහණයක්.  එයා කරන තරමක් කෙරුවේ ආණ්ඩුවට බැනුම් අස්සන, ආර්ථිකමය වශයෙන් වැඩකට නැති දේවල්. ආණ්ඩුව මුලු හදින්ම ඒකාබද්ධයට ස්තූතිවන්ත වෙන්න ඕනෑ ඒ උදව්ව කරලා දුන්නට. එයාලගෙ විවේචන නැතිනම් රවී මේ බජට් එකත් හොඳට අනලා ආණ්ඩුව "n" වැනි වතාවටත් හොම්බෙන් යවලා.





මුදල් ඇමතිකම් කරලා කිසිම පලපුරුද්දක් නැතත්, මංගල සමරවීර ඊට වඩා බොහෝ සෙයින් ප්‍රායෝගිකව හිතන්න පුලුවන් මනුස්සයෙක් බව එයාගෙ මංගල අයවැයෙන් පෙන්නුවා කියලා මට හිතෙනවා.

බොහෝ පැතිවලින් ෆේල් වගේ පෙනුනත් ආණ්ඩුව ජයග්‍රහණ කිහිපයක්ම ලබලා තියෙනවා. එකක් තමයි කඩාවැටෙන්නේ නැතුව කොහොම හරි ආණ්ඩුව ගෙනයාම. 

මේක සිනහවට කාරණයක් කරගන්න එපා.

රටක් විධියට ඒක වැදගත් වෙන්නේ සාධාරණ මැතිවරණයකින් බලයට පත්වෙන රජයකට, ඔවුන්ට ජනතාව ලබලා දුන්න කාළය ආණ්ඩු කිරීමේ අයිතිය තියෙනවා කියන පදනම මත. එහෙම නැතිනම් චන්ද තියලා ආණ්ඩු පත්කරගන්න එක විහිලුවක් වෙනවා. විරුද්ධවාදීන් කැකෝ ගැහුවට, පාරවල් බ්ලොක් කරාට, පාද යාත්‍රා තිබ්බට චන්දෙන් පත්වුනු ආණ්ඩුවක්, සිය නියමිත කාලසීමාව අවසන් කරන්න ඉස්සෙල්ලා දාලා යන්න අවශ්‍ය නෑ. ජනතාවට තව අවුරුදු 2කින් අලුත් ආණ්ඩුවක් පත්කර ගන්න අවස්ථාව එනවා. 

මේක ජයග්‍රහණයක් වෙන්නේ දේශපාලන ස්ථාවරත්වය කියන දේ නිසාමත් නෙමෙයි, ආර්ථික වශයෙනුත් නියමිත කාලෙට ඉස්සෙල්ලා චන්ද තියන්නට සිදුවීම, චන්දෙන් පත්වෙන ආණ්ඩු ලේසියෙන් පන්නලා දාන්න පුලුවන් වීම ඉතාමත් භයානකයි. දේශපාලන ස්ථාවරත්වය රටක ආර්ථිකයට ඉතාමත් වැදගත්. ව්‍යාපාරිකයින්ට වැදගත් වෙන්නේ කොයි ආණ්ඩුව බලයේ ඉන්නවද කියන එකට වඩා ආණ්ඩුවක් පත්වුනාම නියමිත කාලෙ වෙනකන් ඒ ආණ්ඩුව තියෙයි කියලා සිතාගෙන සිය ව්‍යාපාරික සැළසුම් සකස් කරගන්න ලැබීම. 

අවුරුද්දෙන් දෙකෙන් ආණ්ඩු වෙනස්වීම ව්‍යාපාරික සැලසුම් වලට, දේශීය ආයෝජන වලට විදේශීය ආයෝජන වලට දැඩි ලෙස බලපානවා. ආණ්ඩුවක් වැටුනම ඊලඟ ආණ්ඩුව එනකන් අස්ථාවරයි. ඒ ගන්ධබ්බ කාලේ හැම ව්‍යාපාරයක්ම තමන්ගේ ආයෝජන නවත්වලා බලාගෙන ඉන්නවා, සැළසුම් නවත්වනවා. නව බඳවාගැනීම් අත්හිටුවනවා. මේ ඇත්ත ලංකාවේ බොහෝ දෙනෙකුට තේරෙන්නේ නෑ.

තිබුණ ආණ්ඩුව කඩා වැටිලා තව ආණ්ඩුවක් ආවත්, ස්ථාවර ආණ්ඩුවක් පත්වෙයිද? බහුතරය නැති වැට උඩ එකක් වෙයිද? ඒකත් වැටෙයිද? වට්ටයිද? කියන ගැටලුව තියෙනවා. ආණ්ඩුවක් වට්ටන්න ඇතිකරන්න ඕනෑ සමාජයික කැළඹීම, වර්ජන, වීදි සටන් ආර්ථිකයකට කෝටි ගණන් පාඩු කරන දෙයක්. ඒකෙ පාඩුව ව්‍යාපාරිකයන්ට විතරයි කියලා හිතන මිනිස්සු ලංකාවේ බහුතරයක් ඉන්නෙ. ඒත් ව්‍යාපාරවලට වදිනවා කියන්නේ හැමෝටම වදිනවා කියන එක. රටක් පවතින්නේ, දියුණු වෙන්නේ ව්‍යාපාර නිසා මිසක් ආණ්ඩු නිසා නෙමෙයි. මේ ඇත්ත තේරුම් ගන්න ලංකාවේ බහුතර ජනතාවට තව අවුරුදු 20ක්වත් යයි.

ඒවගේම ආණ්ඩුව ප්‍රභල වෘත්තිය සමිති වලට සිය සීමාවන් කියලා දෙන්න සමත්වෙලා තියෙනවා. සැලසුම් සහගතව හෝ ආණ්ඩුවට වර්ජන පාලනය කරන්න සැලැස්මක් නැති නිසාම පාලනයකින් තොරව අරගෙන ගිය වර්ජන, වර්ජකයින් මිනිස්සුන්ගෙන් ගුටි කන තත්වෙට ගෙන එන්නට ආණ්ඩුව සමත්වුනා. තව අවුරුද්දක් වත් යනකන් දොස්තර මහත්තුරුන්ට මහා වැඩ වර්ජන කරන්න හම්බුවෙන්නේ නෑ. තෙල් මහත්තුරුන්ටත් එහෙමයි. තෙල් නෑ කියන්නේ මිනිස්සුන්ට කන්ඩ බොන්ඩ නැතිවුනාට වඩා අමාරු දරාගන්න බැරි දෙයක් කියලා 2017 අවුරුද්දෙ ඔප්පුවුනා. 

තෙල් බෙදාගන්ඩ බැරි ආණ්ඩුවක් බලය බෙදන්නේ කොහොමද කියලා තෙල් පෝලිමේ ඉන්න ගමන් සවුන්ඩ් බයිට් දීලා ආතල් ගත්තට, තෙල් නැතිවුනාම ගුටි කන්ඩ වෙන්නේ ආණ්ඩුවට නෙමෙයි කියලා පෙන්වන්න මේ ආණ්ඩුව සමත්වෙලා තියෙනවා.

ඒවගේම රටක් ඉදිරියට යන්නට ආණ්ඩුවක ප්‍රතිපත්ති වැදගත් වුනත්, ඇත්තටම ලංකාවේ ආර්ථිකයට ආණ්ඩුවකට කරන්න පුලුවන් ලොකුම සේවය අනවශ්‍ය ගැටලු ඇති නොකර ව්‍යාපාරිකයින්ට ව්‍යාපාර කරන්න ඉඩදීලා ආණ්ඩුව පැත්තකට වෙන එක කියලත් 2017 අවුරුද්දේදී රනිල්-මෛත්‍රී රජය ක්‍රියාවෙන් පෙන්නලා තියෙනවා.

මේ ප්‍රතිපත්තිය නිවැරදියි කියන එකට එකම එක උදාහරණයක් විධියට 1996දී චන්ද්‍රිකා ආණ්ඩුව ගත්ත ප්‍රතිපත්තිමය තීන්දුවක් පෙන්වන්න පුලුවන්. කොළඹ වරායේ SAGT නැතිනම් ස්වුත් ඒෂියා ගේට්වේ ටර්මිනල් කියන කන්ටේනර් ගොඩබෑමේ හා ප්‍රතිනැව්ගත කිරීමේ ව්‍යාපෘතිය ජෝන් කීල්ස්-පී ඇන්ඩ් ඕ සමාගම් ඒකබද්ධයට ලබාදීම ඒ ප්‍රතිපත්තිමය තීන්දුවයි. ඒ කාලේ මේ ව්‍යාපෘතිය හැඳින්වුවෙත් වරාය කුණුකොල්ලෙට විකුණන, දේශිය සම්පත් විකුණන් කන, ආර්ථික මර්මස්ථානයක් දෙමළ කෙන් බාලේන්ද්‍රන්ගේ JKH කොම්පැණියට විකුණන්ඩ යන ව්‍යාපෘතියක් විධියට.

සන්ඩේ ලීඩර් කතෲ ලසන්ත වික්‍රමතුංග මහත්තයා මේ ව්‍යාපෘතියට ගහන්න පුලුවන් හැම විධියටම ගැහුවා. මේ දැවැන්ත විදෙස් ආයෝජන ව්‍යාපෘතිය භාරව හිටපු එවක BOI සභාපති තිලාන් විජේසිංහ මහතාටයි, මනෝ නානායක්කාර මහතාටයි පෞද්ගලික ජීවිත පවා ඇදගෙන Sunday Leader මඩ ගැහුවා. ඒත් ව්‍යාපෘතිය සිද්ධ වුනා. 

1999 අවුරුද්දේ අත්සන් කරපු මේ ගිවිසුමෙන් අවුරුදු 16කට පස්සේ බැලුවම SAGT ව්‍යාපෘතිය වරාය අධිකාරියට පිරිවැයක් නැතුව ඩොලර් මිලියන ගණනක ආදායමක් ලබාදීලා. වරායේ මෙහෙයුම් වලින් ඉතාම කාර්යක්ෂම අංශය බවට SAGT පත්වෙලා තියෙනවා පමණක් නොවේ වගේම මහා විශාල නැව් පවා ඇතුලුකල හැකි ආසියාවේ වරායන් කිහිපයෙන් එකක් බවට කොළඹ වරාය පත්කරන්නත් මේ ව්‍යාපෘතිය සමත්වෙලා තියෙනවා. හැමෝම බැණපු චන්ද්‍රිකා නෝනාගේ ඒ ප්‍රතිපත්තිමය තීරණය රටට වාසිදායක වූ බව දැන් ඔප්පුවෙලා.

ඔය ව්‍යාපෘතිය ආණ්ඩුවෙන් කරන්නට ගියා නම් කෝටි ගණන් වැඩිපුර වියදම් කරලා, කොමිස් ගිලලා රටේ මිනිස්සු තව ණය කරනවා විතරක් නෙමෙයි වරාය වෘත්තීය සමිති බයියලා ඔය ටර්මිනල් එක ආසියාවේ අකාර්යක්ෂමම කන්ටේනර් මෙහෙයුම් ව්‍යාපෘතිය බවටත් පත් කරනවා.

ඒ විතරක් නෙමෙයි උද්ධමනය, විනිමය අනුපාත, විදෙස් ආයෝජන වගේම රටක දියුණුවට හා ජන ජීවිතය සැපවත් වීමට ව්‍යාපාර ක්ෂේස්ත්‍රයේ වර්ධනය වැදගත්. බිස්නස් කොන්ෆිඩන්ස් හෙවත් ව්‍යාපාරිකයින් ඉදිරිය පිලිබඳව දක්වන විශ්වාසවන්ත භාවය යහපාලන ආණ්ඩුවේ වැනෙන ප්‍රතිපත්ති නිසා කඩා වැටිලා. රාජපක්ෂ ආණ්ඩුවේ ක්‍රියාකලාපය දරදඬුවුනත් ඔවුන් නිස්චිත ප්‍රතිපත්තියක හිටියා. ඒවගේම දැන් නරි නාඩගම් නටන, වාතයක් ගියත් වර්ජන තර්ජන දාන වෘත්තීය සමිති ඒකාලේ බොහෝම කීකරුව ලඟට වැටෙන දෙයක් කාලා නිදාගෙන හිටියා.

ඒ නිසා ව්‍යාපාරිකයින්ට නිසි සැලසුමකට තමන්ගේ ව්‍යාපාර කරගෙන යන්න ඉඩ ලැබුණා. ඕනෑම බිස්නස් එකක් කර ගන්න, අවසර ගන්න, කොන්ත්‍රාත් ලබාගන්න කතාකරන්න ඕනෑ කාටද?, ලබාදිය යුතු ප්‍රතිශතය කුමක්ද? කියන එක පැහැදිලිව තිබුණා. ඒ නිසා දිය යුතු අයට කුට්ටිය දීලා වෙන කරදරයක් නැතුව බිස්නස් කරන්න පුලුවන් වුනා. ඒ නිසා ඒකාලේ බිස්නස් කොන්ෆිඩන්ස් බොහෝම ඉහලින් තිබුණා. ඒත් 2016/2017 කාලේ ආණ්ඩුව ඔන්න වැටෙයි මෙන්න පෙරලෙයි වගේ තිබුණ නිසාත්, පසුගිය රජය පටන් ගත්ත දැවැන්ත ව්‍යාපෘති සමහර ඒවා මෝඩකම නිසා අනවශ්‍ය ලෙස ප්‍රමාද කිරීමේ ප්‍රතිපත්තිය හේතුවෙනුත් බිස්නස් කොන්ෆිඩන්ස් හොඳටම වැටුනා.

ඒවගේම එදත් අදත් රට කාළකන්නි කරන වෘත්තීය සමිති ව්‍යාපාර හා අන්තරේ ටාසන්ලාගේ කෙලවරක් නැති නාඩගම්, පාරවල් වැහිලි හා උද්ගෝසන නිසා මිනිස්සුන්ට බිස්නස් කරන එක එපාවෙන්න ගත්තා. හැම දෙයක්ම අනවශ්‍ය ලෙස ප්‍රමාද වෙනකොට, තීරණ පරක්කු වෙනකොට, ගත්ත තීරණ ආපහු හැරවෙන කොට, 10%ක් අහවලාට දීලා සැනසිල්ලේ බිස්නස් කරන්න තිබ්බානම් කොච්චර හොඳ දැයි රටේ ව්‍යාපාරිකයින්ට හිතෙන්න වුනා.

වෘත්තීය සමිති රට කාළකණ්නි කරනවා කියන කතාවට කාට හරි තරහක් ඇති වෙනවානම්, එක උදාහරණයක් පෙන්වන්නම්. මේ උදාහරණ ලංකාව වගේ 1948 ඉඳන් තාමත් සංවර්ධනය වන රටකින් නෙමෙයි. සංවර්ධිත රාජ්‍යයක් වෙන එක්සත් රාජධානියෙන්.

ලෝකයේ මහා පරිමාණයෙන් කාර් හදන්න පටන් ගත දවසේ ඉඳලාම ලෝකයේ වාහන කර්මාණ්තයේ අංක 2 නැතිනම් 3 මට්ටමේ හිටියේ මහා බ්‍රිතාන්‍යය. ලේලන්ඩ්, මොරිස්, රෝවර් කියන දැවැන්ත සමාගම් මුලු ලෝකෙටම කාර් විතරක් නෙමෙයි වෑන්, ට්‍රක්, පොඩි ලොරි, ලොකු ලොරි වගේ හැම ජාතියක්ම හැදුවා. බ්‍රිතාන්‍ය අධිරාජ්‍යය නැතිවෙලා අවුරුදු 25ක් ගතවුනු 1975 වෙනකොටත් ලෝකේ බ්‍රිතාන්‍ය ආභාෂය තිබූ හැම රටකම පාරවල් වල දිව්වේ බ්‍රිතාන්‍යයේ හදපු වාහන, නැතිනම් බ්‍රිතාන්‍ය සමාගම් වලින් ලයිසන් අරගෙන ඒ රටවල් වල හදපු වාහන.

සාමාන්‍යයෙන් මිනිස්සු හිතන්නේ බ්‍රිතාන්‍ය වාහන කර්මාණ්තය කඩා වැටුනේ ජපන් තරඟයට මුහුණ දෙන්න බැරුව කියලා. ඒත් එහෙම නම් ජර්මනියේ, ඉතාලියේ, ප්‍රංශයේ කාර් සමාගම් ඒ විධියට බංකොලොත් වෙන්න ඕනෑ. එහෙම වුනේ බ්‍රිතාන්‍යයේ විතරයි.

මේ විනාශයට හේතුව ජපන්නු නෙමෙයි.  බ්‍රිතාන්‍ය කොමියුනිස්ට් පක්ෂයේ සමාජිකත්වය දරපු, බ්‍රිතාන්‍ය වාහන කර්මාණ්තයේ සේවක වෘත්තීය සමිති සන්ධානවල අසහාය නායක "ඩෙරෙක් රොබින්සන්"

1970 දශකයේ බ්‍රිතාන්‍ය මෝටර් රථ කර්මාණ්තයේ කම්කරු සටන් වලට නායකත්වය දීපු ඩෙරෙක් රොබින්සන් වැඩ වර්ජන 500කට වඩා මෙහෙයවලා තියෙනවා. රොබින්සන්ගේ මහා වැඩවර්ජන නිසා කෙලින්ම බ්‍රිතාන්‍ය රථවාහන කර්මාණ්තයට සිදුවුනු පාඩුව පවුම් මිලියන 200කට අධිකයි කියලා ගණන් බලලා තියෙනවා. මේ මිනිහා බ්‍රිතාන්‍ය මෝටර් රථ කර්මාණ්තයේ මිනිස් පැය ලක්ෂ ගණනක් නිකරුනේ නාස්තිකලා. සමාගම් සතු කෝටි ගණන් වටින ස්ථාවර වත්කම්, යන්ත්‍ර සූත්‍ර සමහර වෙලාවට සති ගණන් ඇදුනු වැඩ වර්ජන නිසා ආදායම් උපදවෙන්නේ නැතුව ක්ෂයවෙමින් ගියා. 

ඩෙරෙක්ගේ මහා කම්කරු සටන් වල අවසාන ප්‍රතිපලය මොකක්ද?

> මොරිස් මයිනර් කාර් 1,368,291ක අලෙවි වාර්තාවක් තිබ්බ මොරිස් සමාගම 1984දී බංකොලොත් වුනා. දැන් මොරිස් සන්නාමය අයිති චීනෙ SAIC සමාගමට.

> ලේලන්ඩ්, ඔස්ටින්, ලෑන්ඩ් රෝවර්, ට්‍රයම්ප් වගේ ජනප්‍රිය සන්නාමවල අයිතිකාර "බ්‍රිටිෂ් ලේලන්ඩ්" සමාගම 1986දී බංකොලොත් වුනා. අද ලේලන්ඩ් කියන සුපිරි බ්‍රිතාන්‍ය සන්නාමය වාහනයක රැඳිලා තියෙන්නේ දකුණු ඉන්දියාවේ මූන්ජල් පවුලට අයත් "හින්දූජා" කියන සමූහ ව්‍යාපාරයට අයිති අෂෝක් ලේලන්ඩ් කොම්පැණිය නිසා. 1954දී ඇතිකරගත් ගිවිසුමකට අනුව තාමත් අෂෝක් ලේලන්ඩ් සන්නාමය පවතිනවා.

> රෝවර් සමාගම අවුරුදු ගණන් පාඩු ලබලා 2000වසරේදී වහලා දැම්මා.

> බ්‍රිතාන්‍යයේ බංකොලොත් MINI සන්නාමය අද ජර්මනියේ BMW සමාගමට විකුණලා. ඔවුන් MINI බොහෝම සාර්ථක වාහන මාදිලියක් බවට පත්කරලා. 

> බ්‍රිතාන්‍ය රැජිනගේ ප්‍රියතම වාහනයක් වන Land Rover වගේම සුපිරි Jaguar සමාගමත් අද අයිති ඉන්දියාවේ ටාටා සමාගමට. Land Rover හා Jaguar අද ටාටා යටතේ කෝටි ගණන් ලාභ ලබනවා.

> රෝල්ස් රොයිස් - සුපිරි ධනවතුන් වෙනුවෙන්ම මහා බ්‍රිතාන්‍යයේ ප්‍රෞඩ නිෂ්පාදනය අද අයිති වෙලා තියෙන්නේ ජර්මනියි BMW සමාගමට.

> බෙන්ට්ලි -  තවත් සුපිරි, අති සුඛෝපභෝගී කාර් හදපු ලෝක ප්‍රකට බ්‍රිතාන්‍ය සමාගමක්. දැන් අයිති ජර්මනියේ වොක්ස්වැගන් සමාගමට

බ්‍රිතාන්‍ය මෝටර් රථ කර්මාණ්තයට වෙලා තියෙන විනාශය පේනවා නේද?

බ්‍රිතාන්‍ය වාහන සමාගම්වල හා ඒ සමාගම්වල සැපයුම් සමාගම් වල වැඩකරපු දස දහස් ගණනකට රස්සාවල් නැතුව ගියා. ලෝක ප්‍රකට බ්‍රිතාන්‍ය නිෂ්පාදන ආර්ථිකයට මරු පහරක් වැදුනා. කොහොමද ඩෙරෙක් රොබින්සන් ගේ මන රන්ජන වැඩ වර්ජන බ්‍රිතාන්‍යයේ මහා වාහන කර්මාණ්තයට අත්කරලා දීපු සෙතේ? මිනිහෙකුට රටකට මීට වඩා විනාශයක් කරන්න පුලුවන්ද?

ඇටකටු කුඩුවෙන්න ගහන්නේ නැති ආණ්ඩුවක් බලයේ හිටපු හැම කාලෙකම වගේම 2017 අවුරුද්දේත් ලංකාවේ වෘත්තිය සමිති මේ වගේම විනාශයක් කරන්න අර ඇද්දා.  මිනිස්සුන්ගේ විරෝධය නැතිනම් මේ විනාශකාරී ක්‍රියාවලිය තවත් ඇදගෙන යන්න ඔවුන් බොහොම කැමතියි. එහෙත් මහජන කෝපය කියන සීමාව ඔවුන්ව කොටුකරා කියලා කියන්න පුලුවන්. ආණ්ඩුවෙන් ගහනවා වගේ නෙමෙයි මිනිස්සු ගහනකොට.

ලංකාවේ මිනිස්සු සීමාන්තික ඉවසීමෙන් බැහැර වෙලා හැම දේටම සීමාවක් තියෙනවා කියලා විවිධ ආකාරවලින් දැනුම් දුන්න අවුරුද්දක් 2017. ඉස්සරනම් මිනිස්සු මේ විධිය දැනුන් දීම් කලේ ආණ්ඩුවලට විතරයි.

සමාජ ජාල හැම මනුස්සයෙකුගේම සාක්කුවට රිංගලා නිරන්තරයෙන් යාවත්කාලීන කරනවා. ඉස්සර ජාතික නාලිකාව, සිරස, දෙරණ, හිරු ආණ්ඩුවට ඕනෑ දේ, නැතිනම් ටීවී චැනල් මුදලාලිලාට ඕනෑ දේ විතරක් රටටම කාණ්දු කරුවාට දැන් එහෙම බෑ. මිනිස්සු ඉක්මණටම ඇත්ත දැන ගන්නවා. ඇත්ත පැතිරෙනවා. අකුරු ටිකක් යවනවා වගේම වේගයෙන් ඡායාරූප, වීඩියෝ මිනිස්සුන්ගේ සාක්කුවට යනවා.

සිරසේ මීඩියා සීරෝලා ටයි කෝට් ඇඳගෙන බැඳුම්කරේ ගැන විතරක් පට්ට ගැහුවට මිනිස්සු සිරසෙ මහාරාජකීය බොස්ලා ගෑවිලා ඉන්න සංඛ්‍යාත මගඩිය වගේම කබල් රුසියන් ගෙපාර්ඩ් නැව් මගඩිය ගැනත් ෆේස්බුක් එකෙන් දැන ගන්නවා. ඒවා ගැන වැඩි විස්තර තියෙන බ්ලොග් පෝස්ට් ගැනත් ෆේස්බුක් එකෙන්ම දැන ගන්නවා. බස් එකේදී, කෝච්චියේදී ට්‍රැෆික් එකේ හිරවෙලා ඉන්න අතරේම ඒවා ෆෝන් එකෙන් කියවනවා. දැනුවත් වෙනවා.

චැනල් කාරයෝ, පත්තර කාරයෝ හංගලා ගහන, කොලේ වහලා ගහන ගැහිලි, ඒකපාර්ශවීය අදහස් පලකිරීම් වෙනුවට 2017 අවුරුද්ද වඩාත් පාරදෘෂ්‍ය ලෙස තොරතුරු විහිදෙන්න පටන්ගත් අවුරුද්දක් නිසා පරණ සෙල්ලම් කල්පනාවෙන් කරන්න කියලා අවවාදයක් කෙරුවොත් හොඳයි කියලා හිතනවා. ජන ජීවිතය අවුල් කරන්නට අර අඳින්නන් හොඳට සිහියට ගන්නට ඕනෑ මිනිස්සුන් ඇත්ත දැනගෙන ඉක්මණට ප්‍රතික්‍රියා කරන, විරෝධය දක්වන තැනකට 2017දී රට ප්‍රවේශවෙලා තියෙන බව.

වෘත්තිය සමිතිවලට, ශිෂ්‍ය සංගම්වලට කාදමන්නට ඕනෑ තරම් කාළය තිබුණත් එදිනෙදා ජීවත් වෙන්න වෙර දරන මිනිස්සුන්ට එහෙම නාස්ති කරන්න කාළයක් නෑ.  පාන්දර හතරේ ඉඳන් නැගිටගෙන උයලා, පාර්සල් බැඳලා කෑම පැකට් 100ක් දාගෙන ත්‍රීවිලර් එකෙන් ඒවා කඩවලට දාන්න දුවන මිනිහාට පැට්‍රෝල් ටිකක් ගහගන්න බැරි වෙලා, බෝඩ් උස්ස ගත්ත බහුබූතයෝ ටිකක් හින්දා පාර වහලා ඒ මනුස්සයාට කෑම ටික වෙලාවට කඩවලට දාගන්න බැරි වුනොත්, ඒ මනුස්සයා මොකද කරන්නේ? කෑම පැකට් සීය ගෙදර අරගෙන ගිහිල්ලා කන්නද? පහු වෙනිදට කෑම උයන්න බඩු ගන්නේ ණයටද?

2017 කියන්නේ ඒ කෑම පැකට් මනුස්සයාටත් තමුන්ගේ විරෝධය නිසි තැනට එල්ල කරන  අවස්ථාව ලැබෙන්න පටන්ගත් අවුරුද්ද. ඒ විරෝධය පාරවල් වහගෙන නටන මීමුන්ට විරෝධය දක්වන පෝස්ට් එකකට දාන ලයික් එකක් වගේ සුලු එකක් වෙන්න පුලුවන්. ඒත් බුකියේ ඇල්ගොරිදම් වලට අනුව ලයික් වැඩිවෙනකොට පෝස්ට් එක පැතිරෙනවා, තව තව අයගේ ටයිම් ලයින් වල පෙනෙන්නට පටන් ගන්නවා . දිගටම ලය්ක් වුනොත් වයිරල් වෙනවා. බස් එකේ කෝච්චියේ යන මිනිහාගේ තරහ, කේන්තිය, විරෝධය සමාජ ජාල හරහා වයිරල් වෙලා ජනගත වෙන්නේ ඒ විධියට. 2017 අවුරුද්ද සාමාන්‍ය මිනිහාගේ විරෝධය වයිරල් වෙන හැටි හොඳටම දකින්න ලැබුණු අවුරුද්දක්

ඒවගේම විරෝධය දක්වන්නට ඉක්මණට මිනිස්සු එක් තැනකට ගෙන්වන්නට පුලුවන් අවස්ථාව ඕනෑම කෙනෙකුට තියෙනවා. මිනිස්සු බලගැන්විලා තියෙනවා.

ඉස්සර මේ බලය තිබුණේ සංවිධානාත්මක දේශපාලන පක්ෂවලට විතරයි. එක රැයකින් රටපුරා එකම පෝස්ටරයක් අලවන්න හැකියාව තිබුණේ JVP එකට විතරයි. ඒත් දැන් ඒ සුපිරි හැකියාව නිෂ්ක්‍රිය වෙලා. දැන් හැමෝමට පුලුවන් උදේ නැගිට්ට ගමන් කියවන්න පණිවුඩයක් රටටම යවන්න.

ඒ පණිවුඩ වලින් නැති පැට්‍රෝල් පෝලිම් ඇති කරන්න වගේම පැට්‍රෝල් පෝලිම්, කෝච්චි බස්, ඉස්පිරිතාල ස්ට්‍රයික් ඇති කරමින් මිනිස්සුන්ට අනවශ්‍ය ලෙස වද දෙන්නන්ට අමතක නොවන ගේමක් ඕගනයිස් කරන එකත් බොහොම ලේසියෙන් පුලුවන්.

මහින්ද මහත්තයා පෝට් සිටිය හදන්නට හිටවපු සමරු පලකෙ ගලවලා ලොරියක දාගත්ත හැටි මිනිස්සු දැක්කෙ සමාජ ජාල වලින්. ඒවගේම  ප්‍රයිවට් කැම්පස් වහන්නම ඉපදිලා ඉන්නවා වගේ පෙන්නන අන්තරේ කමාන්ඩර්ලාගේ පවුලේ ලේ නෑයෝ ප්‍රයිවට් කැම්පස් සමග තියෙන ආත්මීය බැඳීම මිනිස්සු දැන ගත්තෙත් සමාජ ජාලවලින්. ඒ මහත්තුරු සෞඛ්‍ය අමාත්‍යාංශයට කඩා වැදීලා STF කොල්ලන්ට කුණු හරුපෙන් බනිද්දිත් උන් ආයුධත් අතේ තියාගෙන සිනාමුසු මුහුණින් ඒ අපහාස ඉවසාගෙන ඉන්නවා දැක්කෙත් සමාජ ජාලවලින්මයි. STF කොල්ලන්ට මීට පස්සේ ප්‍රතිකාර නෑ කියලා ළාමක ඩොකෙක් ඇනගත්තේත් බුකි අවකාශයේමයි.

මේ නිසා හැංගි හැංගි බඳින වෙස්මූණු ගැලවිලා, රෙදිත් කැඩිලා යට ඇඳුමෙන් දුවන්න සිද්දවෙන්න ඕනෑ කරන්නේ එකම එක ෆේස්බුක් ෆොටෝ එකක් වයිරල් වෙන එක විතරයි කියන එක 2017දී රටක් විධියට අපි ඉගෙන ගත්ත පාඩමක් කියලා හිතන්න පුලුවන්. මේ නිසා ආණ්ඩුවට වගේම වෙන මොන පාර්ශවයකටත් කොලේ වහලා මිනිස්සු රවට්ටන්න පුලුවන් කමක් නෑ. 2018 එලි පත්තේ ඉන්න මේ මොහොතේ හැමෝම මේක වටහා ගන්නවානම් හොඳයි.








__________________________________________________________________________
Creative Commons License VIDYA GAWESHANA - විද්‍යා ගවේෂණ by Terence Kahapola Arachchi is licensed under a Creative Commons Attribution 4.0 International License. Based on a work at http://vidya-gaweshana.blogspot.com/. Permissions beyond the scope of this license may be available at http://vidya-gaweshana.blogspot.com/. . POSTED BY : Terence Kahapola Arachchi  . AUTHOR/OWNER/ADMINISTRATOR . CONTACT    : terence.arachchi@gmail.com . GOOGLE +   : About Me  . FACEBOOK : www.facebook.com/terence.arachchi  .   __________________________________________________________________________
Related Posts Plugin for WordPress, Blogger...